റബര്‍ വില മെച്ചപ്പെട്ടെങ്കിലും മഴ ഉല്പാദനത്തിന് തടസ്സമാകുന്നു

കൊച്ചി: റബറിന് വില മെച്ചപ്പെട്ടു തുടങ്ങിയെങ്കിലും ഉല്പാദനമില്ലാത്തതിന്റെ വിഷമത്തിലാണ് കര്‍ഷകര്‍. കഴിഞ്ഞ ആറുമാസക്കാലമായി തുടരുന്ന മഴ കാരണം ഉല്പാദനമാകെ നിലച്ച മട്ടാണ്. വില കുറവായതിനാല്‍ മിക്ക കര്‍ഷകരും ടാപ്പിംഗ് നിര്‍ത്തിവെച്ചിരിക്കുകയാണ്. അപ്പോഴാണ് വിലയില്‍ മാറ്റമുണ്ടായത്.

ആഭ്യന്തര വിപണിയിൽ 161 രൂപ വരെയെത്തിയ റബർ വില രണ്ട് ദിവസംകൊണ്ട് 159 രൂപയായി കുറഞ്ഞു. കഴിഞ്ഞവർഷം ഇതേസമയത്ത് വില 120 രൂപയോളമായിരുന്നു. 123 രൂപ വിലയുണ്ടായിരുന്ന റബറിന് പത്ത് ദിവസത്തിനുള്ളിൽ 38 രൂപയോളമാണ് വർദ്ധിച്ചത്. 71 രൂപയുണ്ടായിരുന്ന ഒട്ടുപാൽ 90 രൂപയിലുമെത്തി. അപ്രതീക്ഷിത വിലക്കയറ്റത്തെ തുടർന്ന് ടാപ്പിംഗ് ഉഷാറാക്കുകയാണ് കർഷകർ. എന്നാൽ, റബർ വില 200ലേക്ക് പോകുമെന്ന പ്രതീതിക്കിടെയാണ് രണ്ട് ദിവസമായുള്ള വിലക്കുറവ്.

2017 ഒക്ടോബറിലും സമാനമായ വിലവർദ്ധനയുണ്ടായെങ്കിലും വൈകാതെ കുറഞ്ഞിരുന്നു. ഇനിയും വില വർദ്ധിക്കുമെന്ന പ്രതീക്ഷയിൽ കർഷകർ വിൽക്കാതെ ശേഖരിച്ചുവച്ചതിനാൽ ഉത്പന്നം മാർക്കറ്റിലെത്തിക്കാനുള്ള തന്ത്രമാണ് പെട്ടെന്നുള്ള വിലയിറക്കമെന്ന കണക്കുകൂട്ടലുമുണ്ട്. ആന്താരാഷ്ട്ര വിപണിയിൽ വില 200 രൂപ കടന്നിട്ട് ദിവസങ്ങളായി.

കൊവിഡിന് ശേഷം വാഹന വിപണിയിലുണ്ടായ ഉണർവിൽ റബറിന്റെ ഡിമാൻഡ് കൂടി. ടയറിന് പുറമേ, സീറ്റും ചവിട്ടിയുമടക്കമുള്ള സാമഗ്രികൾക്കായി വൻതോതിൽ റബർ വേണം. ചൈനയടക്കമുള്ള രാജ്യങ്ങൾ സ്വാഭാവിക റബർ വാങ്ങിക്കൂട്ടുകയാണ്. റബർ സുലഭമായി ലഭിക്കുന്ന മലേഷ്യയും ഇൻഡോനേഷ്യയും ഉൾപ്പെടെയുള്ള രാജ്യങ്ങളെ മഴ ബാധിച്ചു. കൊവിഡ് മൂലം തൊഴിലാളികളെ കിട്ടാനില്ലാത്തതും പ്രതിസന്ധിയായി.

കാലങ്ങളായി റബറിന് വിലയില്ലാത്തതിനാൽ ഭൂരിഭാഗം കർഷകരും റബർ ഉപേക്ഷിച്ചമട്ടിലായിരുന്നു. പലരും റബർ വെട്ടിമാറ്റി പകരം പ്ളാവും തെങ്ങുമൊക്കെ നട്ടു. കൂലികൊടുത്താൽ നഷ്ടമായതിനാൽ ടാപ്പിംഗ് ഉപേക്ഷിച്ചവരും ഏറെ. ഏറ്റവും കൂടുതൽ ആദായം ലഭിക്കുന്ന സമയം കൂടിയാണ് ജൂലായ്-ഡിസംബർ കാലം. ഈ സമയത്ത് വിലകൂടിയത് റബറിനെ മാത്രം ആശ്രയിച്ച് ജീവിക്കുന്നവർക്ക് അനുഗ്രഹമായി.

LEAVE A REPLY വാർത്തകളോട് പ്രതികരിക്കുന്നവർ അശ്ലീലവും അസഭ്യവും നിയമവിരുദ്ധവും അപകീർത്തികരവും സ്പർധ വളർത്തുന്നതുമായ പരാമർശങ്ങൾ ഒഴിവാക്കുക. വ്യക്തിപരമായ അധിക്ഷേപങ്ങൾ പാടില്ല. ഇത്തരം അഭിപ്രായങ്ങൾ സൈബർ നിയമപ്രകാരം ശിക്ഷാർഹമാണ്‌. വായനക്കാരുടെ അഭിപ്രായങ്ങൾ വായനക്കാരുടേത് മാത്രമാണ്. ബിസിനസ് മലയാളിയുടേത് അല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ളീഷ് ഒഴിവാക്കുക.

Please enter your comment!
Please enter your name here