മുംബൈ: റീട്ടെയില്‍, ഇ- കൊമേഴ്സ് രംഗത്ത് കൂടുതല്‍ സജീവമാകുന്നതിനോടനുബന്ധിച്ച് ജിയോ മാര്‍ട്ടില്‍ കൂടുതല്‍ നിക്ഷേപം നടത്തുന്നതിനായി ആര്‍ ഐ എല്‍ (റിലയന്‍സ് ഇന്‍ഡസ്ട്രീസ് ലിമിറ്റഡ്) പദ്ധതി. മറ്റ് കമ്പനികളെ ഏറ്റെടുത്ത് വളരെ വേഗം വിപണി വിഹിതം വര്‍ധിപ്പിക്കുന്നതിനെ കുറിച്ചും റിലയന്‍സ് ആലോചനയിലാണ്. വെള്ളിയാഴ്ച നിക്ഷേപകര്‍ക്കായി പുറത്തിറക്കിയ അറിയിപ്പിലാണ് റിലയന്‍സ് ഇത് സംബന്ധിച്ച പരാമര്‍ശം നടത്തുകയുണ്ടായത്.
കോവിഡ് വ്യാപനം ഇ-കൊമേഴ്സിന് നൽകിയ ഡിജിറ്റൽ ലാഭവിഹിതം പ്രയോജനപ്പെടുത്താൻ ആമസോണും ഫ്ലിപ്കാർട്ടും തയ്യാറെടുക്കുന്നതിനാൽ റിലയൻസിന്റെ പ്രസ്താവനയ്ക്ക് വലിയ പ്രാധാന്യമാണ് വ്യവസായ രംഗത്ത് ഉണ്ടായിരിക്കുന്നത്. ആമസോൺ ഇന്ത്യയിൽ ഒരു ബില്യൺ ഡോളർ അധിക നിക്ഷേപം നീക്കിവച്ചിരിക്കുകയാണ്. ജൂലൈയിൽ ഫ്ലിപ്കാർട്ട് വാൾമാർട്ടിൽ നിന്ന് 1.2 ബില്യൺ ഡോളർ സമാഹരിക്കുകയുമുണ്ടായി.കൂടാതെ ഓഗസ്റ്റിൽ ആർ ഐ എൽ ഓൺലൈൻ ഫാർമസി സംരംഭമായ നെറ്റ്മെഡ്സിനെ സ്വന്തമാക്കി, ഭാവിയിൽ ജിയോമാർട്ടിന്റെ കാർട്ടിലേക്ക് ഫാഷൻ, ജീവിതശൈലി, ഇലക്ട്രോണിക്സ് തുടങ്ങിയ വിഭാഗങ്ങൾക്ക് പുറമെ ഫാർമസി ഉൽപ്പന്നങ്ങളും ചേർക്കാൻ തീരുമാനിച്ചു.
ഗ്രാബ് (ലാസ്റ്റ് മൈൽ ലോജിസ്റ്റിക്സ്), സി-സ്ക്വയർ (അനലിറ്റിക്സ്, റിസോഴ്സ് പ്ലാനിംഗ്), നൗ ഫ്ലോട്ട്സ് (എസ്എംഇകൾക്കുള്ള സോഫ്റ്റ്വെയർ സൊല്യൂഷനുകൾ), ഫിൻഡ് (ഫാഷൻ ഇ-കൊമേഴ്സ്) തുടങ്ങിയ സംരംഭങ്ങളെ 2019 മുതൽ റിലയൻസ് ഏറ്റെടുത്ത് തങ്ങളുടെ റീട്ടെയിൽ കമ്പനിയിലേക്ക് സംയോജിപ്പിച്ചിരുന്നു. ഈ കമ്പനികളുടെ ഓൺലൈൻ കഴിവുകൾ ശക്തിപ്പെടുത്തുന്ന നടപടികളുമായി മുന്നോട്ട് പോവുകയാണ് ഇപ്പോൾ ആർഐഎൽ.
